በሀዋሳ ዩኒቨርሲቲ የማህበራዊ ሳይንስና ስነ-ሰብ ኮሌጅ ከምርርምርና ቴክኖሎጂ ሽግግር ም/ፕሬዚዳንት ጽ/ቤት እና ከሴቶች፣ ህጻናት፣ ወጣቶችና ኤች አይ ቪ/ኤድስ ጉዳዮች ዳይሬክቶሬት ጋር በመተባበር በሰኔ8/2013ዓ.ም የምክክር መድረክ በዋናው ግቢ አካሄዷል፡፡

ዶ/ር አያኖ በራሶ የሀዋሳ ዩኒቨርሲቲ ፕሬዚዳንት  ሀገራችን በአሁኑ ሰዓት የህዝብ ግፊት በወለደው የለውጥ ሂደት ውስጥ የምትገኝና በቀጣይነትም ሰላምን፣ ዲሞክራሲንና ፍትህን ለማስፈን ብዝሃነት፣ መቻቻልና ሀገር ግንባታ በጠንካራ መሰረት ላይ መገንባት ወሳኝ በመሆኑ እንዲሁም ሀገራዊ መግባባትን ማጎልበት፣ ሰላምና የመቻቻል ባህልን የመገንባት ጉዳይ ጊዜ የሚፈልግ፣ ውስብስብና በርካታ ባለድርሻ አካላትን በማሳተፍ ንቅናቄ መፍጠርን የሚጠይቅ፣ ወሳኝ ጉዳዮችን በመለየት የአጭር፣ የመካከለኛና የረጅም ጊዜ ዕቅዶችን በመንደፍ እና የላቀ የማስፈጸም ብቃትንና ክህሎትን የሚጠይቅ ከባድ ኃላፊነት ነው ብለዋል፡፡

ፕሬዚዳንቱ አክለውም እያንዳንዳችን ለግላችን፣ ለቤተሰባችንና ለአካባቢያችን ብሎም ለሀገራችን ሰላም ዘብ መቆም የሁላችን ሀላፊነት መሆኑን በመገንዘብ ሀሰተኛና ግጭት ቀስቃሽ መረጃዎችን ከማጋራት ልንቆጠብ የሚገባ ሲሆን መገናኛ ብዙሃንም የህዝብን ሰላምና ድህንንት እንዲሁም ተነጻጻሪ መብቶችና ጥቅሞችን ባከበረ መልኩ በኃላፊነት መንቀሳቀስ እንዳለባችው በመግለጽ ብዙ የቤተሰብና የማህበረተሰብ ኃላፊነቶች የተሸከሙ ሴት እህቶቻችን በዚህ ሀገራዊ ምርጫ ሚናቸው እጅግ ወሳኝ በመሆኑ የላቀ እና የተሻለ ተሳትፎ እነዲኖራቸው ያስፈልጋል ብለዋል፡፡

ዶ/ር ዳኜ ሽብሩ የማህበራዊ ሳይንስና ስነ-ሰብ ኮሌጅ ዲንእንደገለጹት የሰላምና መቻቻል ጉዳዮች እጅግ አንገብጋቢና የአንድ ሳንቲም ሁለት ገጽታዎች በመሆናቸው ነጣጥለን የማናያቸው ሲሆን ሰላምና መረጋጋት ባልሰፈኑባቸው አካባቢዎች ነግዶ ማትረፍ፣ ሰርቶ መለወጥ፣ ተምሮ ለቁም ነገር መብቃት እንደማይቻልና የዜጎች ደህንነትም አጣብቂኝ ውስጥ እንደሚወድቅ ገልጸዋል፡፡

በፕሮግራሙም ላይ ዶ/ር ዮናስ አዳዬ በአዲስ አበባ ዩኒቨርሲቲ የሰላምና ደህንነት ጥናት ዳይሬክተር እና ተባባሪ ፕ/ር አህመድ ዘካሪያ በአዲስ አበባ ዩኒቨርሲቲ ከኢትዮጵያ ጥናት ኢንስቲትዩት ስለ ሰላም ግንባታ፣ግብዓቶች፣ ተግዳሮቹና የመፍትሄ አቅጣጫዎች ቁልፍ ንግግር ያደረጉ ሲሆን መቻቻል፣ አብሮነትና ሰላም፣ ማህበራዊ ሚዲያ እና ሴቶችና ሰድስተኛው ብሄራዊ ምርጫ በሚል ርዕስ በተለያዩ ተመራማሪዎች ጥናታዊ ጽሁፎች ቀርበ ውይይት ተደርጎባቸው ፕሮግራሙ መጠናቀቁ ታውቋል፡፡